Олинмаган ўч

Ишқнинг йўлагида турган эй, аёл!

Мени ёзғирмагин, қилмагин гина.

Дунё ухлаётган сокин кечада,

Одимла мен сари оҳистагина.

Соқовга айлансин вафоси йўқ ой,

Сирингни сотмасин ичи қора тун.

Севмасдан яшаш ҳам гуноҳ ҳойнаҳой,

Мен кутиб тураман хаёлсиз, беун.

Сен уйдан чиқасан, бостириб келар

Тўртала томондан номус билан ор.

Тақдир маломатин бошингдан элар,

Оппоқ иффатингга чанг солар ғубор.

Шул жойда чегара, соқчилар сархуш,

Сезмасдан қоларлар дунёга хослар…

Истайсан, шунчаки бўлсайди, деб туш,

Ёлғонга эврилиб қолмайди ростлар!

Тўхтатиб қолади аллақандай куч,

Тортар этагингдан жажжи қўл, алҳол.

Шунда юрагингдан қувилади ўч,

Эрига хиёнат қилмаган аёл!

20.04.2016

Исомиддин ПЎЛАТОВ